Əfqanıstanda yoxsullara iş imkanı təmin etmək üçün həyata keçiriləcək bir layihədə işçilərə pul əvəzinə buğda veriləcək.
İslamazeri.com-un "Eastnews.org"-a istinadən verdiyi xəbərə görə, Əfqanıstanda yoxsullara iş imkanı təmin etmək üçün həyata keçiriləcək bir layihədə işçilərin hər birinə gündə 10 kiloqram buğda, mühəndislərə isə 16,5 kiloqram buğda veriləcək. "Taliban" administrasiyasının İnkişaf Agentliyi sədr müavini Riyazəddin Şərifi 40 min nəfəri işlə təmin edəcək "İş üçün buğda layihəsi" ilə əlaqədar açıqlama verərək, Əfqanıstanın iqtisadi baxımdan çətin günlər yaşadığına diqqət çəkib. Şərifi qeyd edib ki, sözügedən layihə əvvəlcə Kabil və ətrafında sonra isə 34 vilayətdə həyata keçiriləcək. Əfqanıstanda dövlətə məxsus anbarlarda 55 min ton buğda olduğunu vurğulayan Şərifi bu layihəni mövcud buğdanı iş qarşılığında yoxsul insanlara paylamaq üçün planlaşdırdıqlarını vurğulayıb.
