Ermənistan və Pakistan qarşılıqlı səfirliklər açacaq
İslamazeri.com xəbər verir ki, Ermənistan və Pakistan hazırda qeyri-rezident səfirliklərin yaradılması istiqamətində addımlar atır.
Bu barədə Ermənistanın xarici işlər naziri Ararat Mirzoyan məlumat verib. Onun sözlərinə görə, ötən il Ermənistan üç ölkə ilə — Lesoto, Solomon adaları və Pakistanla diplomatik münasibətlər qurub.
Nazir qeyd edib ki, xüsusilə Pakistanla münasibətlər uzun illər müəyyən çətinliklərlə müşayiət olunub və bu, həm də Ermənistan–Azərbaycan və Ermənistan–Türkiyə münasibətləri ilə bağlı məsələlərlə əlaqəli olub. Lakin ötən il tərəflər ortaq razılığa gələ biliblər və Pakistan bu prosesə müsbət yanaşıb.
Mirzoyan bildirib ki, artıq diplomatik əlaqələr qurulub və yaxın vaxtlarda səfirlərin akkreditasiyası həyata keçiriləcək. İlkin mərhələdə səfirliklər qeyri-rezident formatda fəaliyyət göstərəcək, lakin proses davam edir.
