İran hökuməti Livandakı hücumların Vaşinqtonla imzalanmış anlaşma memorandumunun birinci maddəsini pozduğunu bildirib.
İranın danışıqlar qrupu, İsrailin Livanın cənubuna davam edən hərbi hücumlarını əsas gətirərək, Cenevrə də daxil olmaqla, İsveçrəyə planlaşdırılan səfərini dayandırdığını açıqladı.
İslamazeri.com xəbər verir ki, "Əl-Məyadin"ə danışan mənbələr bildiriblər ki, Tehran nümayəndə heyəti Vaşinqtonla altmış gün davam etməsi planlaşdırılan danışıqların birinci mərhələsi üçün bütün zəruri səyahət hazırlıqlarını başa çatdırıb, lakin İsrailin hücumları səbəbindən bu qərardan imtina ediblər.
Mənbələr vurğulayıblar ki, Tehran Amerika tərəfinə və vasitəçilərə Livan məsələsinin danışıqların taleyi üçün həlledici əhəmiyyət kəsb etdiyini çatdırıb.
İran tərəfi xəbərdarlıq edib ki, İsrailin Livan ərazisinə on kilometrə qədər dərinliyə çatan əməliyyatları tərəflər arasında əldə edilmiş razılaşmanın əsas müddəalarının açıq şəkildə pozulmasıdır.
Qeyd edək ki, cümə günü İsveçrənin Cenevrə şəhərində Pakistan vasitəçisinin iştirakı ilə başlaması planlaşdırılan 60 günlük danışıqlar prosesi nüvə məsələsinə yekun həll yolu tapmağı hədəfləyirdi.
Lakin Tehran və Vaşinqton arasında imzalanmış anlaşma memorandumunun birinci maddəsi Livan da daxil olmaqla, bütün cəbhələrdə hərbi əməliyyatların dərhal və daimi dayandırılmasını nəzərdə tutur.
Sənəddə Livanın ərazi bütövlüyünün və suverenliyinin qorunması açıq şəkildə təmin edilir.
İran tərəfi atəşkəsin zəruriliyini vurğulasa da, İsrail işğalçı ordusu Cənubi Livana artilleriya bombardmanı və quru hücumlarını davam etdirir.
İsrail tərəfi bölgədəki "genişləndirmə zonası"nın xəritələrini dərc etməklə yeni kəndləri hədəf alan quru əməliyyatlarını dərinləşdirmək niyyətini nümayiş etdirir.
Müqavimət və Tehran cəbhəsi bu hərbi fəaliyyəti razılaşmanın ruhuna və hərfinə birbaşa hücum hesab edir.
