Bütün təhsil sənədləri tamamilə elektronlaşdırılacaq.
Bu tədris ilindən etibarən süni intellekt daha geniş tətbiq ediləcək
İslamazeri.com xəbər verir ki, bunu Elm və Təhsil Nazirliyinin Təhsil Sisteminin İnformasiyalaşdırılması İdarəsinin rəisi Vüsal Xanlarovun “Təhsilin rəqəmsallaşması” mövzusunda keçirilən brifinqdə deyib.
O bildirib ki, tədris ilinin sonunda təhsil sənədləri elektron şəkildə qəbul ediləcək: "Bu məsələ ilə bağlı hazırda işlər görülür. Bütün təhsil sənədləri tamamilə elektron şəkildə olacaq. Bir neçə ay ərzində, əgər şagirdlərə sənəd lazım olarsa, kağız şəklində verilə bilər. Lakin bu tədris ili başa çatdıqdan sonra bütün sənədlər yalnız elektron formada veriləcək. Bu, sənədlərin təqdim edilməsini daha sürətli və təhlükəsiz edəcək. Əvvəllər sənədlər aylarla gözlənilirdi, amma indi elektron sistem vasitəsilə 10 gün ərzində əldə edilə biləcək".
