ABŞ dövlət katibi Antoni Blinken Türkiyənin F-16 təyyarələrini modernləşdirməsinin “ABŞ və NATO-nun maraqlarına uyğun olduğunu” bildirib.
İslamazeri.com xəbər verir ki, Blinken, NATO Zirvəsi üçün olduğu Litvanın paytaxtı Vilnüsdə Amerikanın MSNBC televiziyasına verdiyi müsahibədə, F-16 təyyarələrinin Türkiyəyə verilməsi və bunun ABŞ Konqresinin təsdiqi ilə bağlı sualları cavablandırıb.
"Türkiyənin bu təyyarələri alması ABŞ-ın, NATO-nun maraqlarına uyğundur. Biz bütün alyans daxilində bunu edirik, bütün üzvlərinin ittifaqı mümkün qədər güclü etmək üçün lazım olan texnologiyaya malik olduğundan əminik", - ABŞ dövlət katibi bildirib.
Antoni Blinken, F-16 təyyarələrinin Türkiyəyə satışı ilə bağlı Konqresin hər iki qanadının etdiyi etirazların necə aradan qaldırılacağı sualına belə cavab verib:
"Bunlar bizim üçün həmişə ayrı-ayrı məsələlər olub. İsveçin NATO-ya daxil olması prosesi Türkiyənin irəliləyişi qəbul etməsi ilə davam edir. Türkiyənin F-16-ları modernləşdirməsi də bu administrasiyanın siyasətidir".
Türkiyənin NATO müttəfiqi olduğunu vurğulayan Blinken, "Bütün NATO-nun birlikdə çalışması və Türkiyənin bu texnologiyaya sahib olması vacibdir" dedi.
